dil prvi, općenito

dil drugi, karanje je spiza za dušu

dil treći, u kužini

dil četvrti, u banju

dil peti, u špajzi

dil šesti, kod likara

dil sedmi, gospe moja, misli da je lip

e... ovo je dosad notano o' XVII. bilo je još nikih tekstova di su se mogli sasvin lipo pripoznat, jedino ča ti nisu spakovani u ovi paket, e... inspiracija je primjerak/ci o' vrste, e... prema istinitin događajima, narafski.

jušto ste takvi, e... a poslin van nikako nije pravo pročitat na ovi internet dvi tri rige o' temu. bunite se, kontreštajete, čak mi je jedan primjerak o' vrste iša i branit da ove tekstove višje nastavljan i ka da ćemo se pokarat ako notan ovi tekst. kako se ti iša karat i brez ovega teksta, friga mi se, ja ću ga notat, šta mi ko more, e...

dakleM, na poslovni put mi je najdraže poć solo. kad ja gren recimo u zagreb dosta mi je i bagaja o' posla, ne tribaju mi dodatni valiži. čin me toka s nekin poć, smrkne mi se, e... zaradi čega, a? zaradi tega jer me toka radit. puno. i niman vrimena za proučavanje metropole, učenje di je koja ulica i sl. ja znan di je koja ulica i di gren. niman vrimena za nečije piši mi se - kaki mi se - gladan/a san - žedan/a san... zaradi tega mi je najdraže poć solo. ujutro najranije san u metropolu, a ako je srića dobra, već pozapodne doma degustiran obid. ritko ostajen višje dana. normalne suputnike ću ipak tolerirat.

a ča je sa privatnin puten, a? e svitu moj, život mi je pokaza da je u takve akcije dobro vodit kumpanje (to obično ispadne dobro ako su kumpanji dobri), nije problem odvest ni malu dicu, pa čak i beštije. jema samo jedna peršona ča š njon nije dobro poć na privatni put jerbo ćete jemat muku isukrstovu oko tega, e... koja? a vaš primjerak o' vrste i to oni ča se ćuti blisko sa vama (momak, muž, brat, ćaća, barba. dida već neće, dide obično jemaju mota sa unucima/unukama... zaradi tega njega će obuhvatit samo dil ove štorije, ne sve, e). ko bi drugo bija, e...

šta očekivat ako s njin grete na privatni put?

- ako se gre tantobuson, vaporon, feraton, aeroplanon i drugin prometalima ča mu nisu u vlasništvu, e tot će ili zakasnit ili doć nikoliko uri prije. nikako neće izabrat neku normalnu uru. valiže mu narafski morate vi spakovat, šta bi se on opće gnjavija sa tin. i narafski da morate znat i sve ča će mu tribat, ali i ono ča mu opće ne triba jerbo se usrid puta more sitit derat ka pravi mulac da mu baš sad triba recimo podvodna puška, a gre u alpe. kad je u prometalo ča mu nije u vlasništvu, budite sigurni da će već kroza petnaest minuti puta u to prometalo držat govor ka ciceron; politički, oni o' futžbala (nogometni), bilo kakvi. i budite sigurni da će se brzo počet kontreštavat sa nepoznatin sviton. jo, zemljo profundaj se, kad sve to izvodi more bit da bi bilo najbolje činit fintu da ga nikad u životu niste vidili i da opće nimate pojma ko je taj čovik. poza žestokih karanja, na kraju će te svoje novopečene kumpanje još zvat i doma, neka dođu u vižite kad budu u split, e... i narafski da će se neko na kraju i stvorit, a vi ćete morat prat pjate poza tih vižita. kad arivate na odredište, padat će mu i jopet svašta na pamet. kapac će čak poć i karat sa lokalnin pučanstvon. ako ne more nać koju ulicu (oli štagod drugo ča traži), napravit će cilu monadu oko traženja i na kraju će se temeljito i sa puno žara izderat na vas lipe moje. da, da, baš tako. a na koga bi drugoga? vi ste mu bliski pa gucajte. ako se za takve svinjare ikad ispriča, bit će to pravo čudo. itd. jema tega još...

- ako se na ti put gre vlastitin prometalon, onda je to nešto najgore šta vas more strefit. sve će iste monade činit ka ča je već gori opisano, ali neće bit ovih putnika sa strane pa će ciceronske govore držat upravo vama. cili put ćete stivat na svoja leđa. laprdat će, karat će se, derat će se, a još kad ne bude mista za parkirat auto oli vezat brod, jopet ćete vi bit krive.

zaključak i savit: škivajte poć na put sa ovima ča su van (navodno) bliski. ti sebi vazimlju svašta za prav činit. i opće ih nije sram. višje pristojnosti pokazuju prima nepoznatoj prodavačici u butigu vengo prima curi/ženi/sestri/čeri. mislin da su ovod puno krive žene. ka matere loše odgoje svoje šesne sinove i poslin na putu (a čini mi se i u životu općenito) jemamo čudila, e... more bit da falijen, ali nekako mi se pari da jedan slavonac ne bi činija ovakve monade. ako me jema ko demantirat, a javite se slobodno, slušan, sa puno pacijence, e...

klanjan se: časnin iznimkama. duboko. i iskreno.

notano o' XVII, brez straja, kome pravo, a kome krivo, e...

žunta:

sad je oko bot i po. reakcije na ovi tekst već stižu. objavljujen ovod ono ča mi pari zanimljivo. komentari drito na blog su i dalje onemogućeni (tako će i ostat) zaradi par imberlanih peršoni ča su mislile da je ovod kondut. a ja nisan dotur psihijatar, e... narafski, to ne znači da kulturne komentare ne čitan. jemate emajliranu škrabicu oli mail i druge vrsti javljanja pa, eto, pišite svitu moj.

d.: "a ca se tice ovih tvojih papana, bas su papani, ako te tako tokalo... misljenja sam da jema jos dobra svita koji znaju ca je bonton i jemaju primjerenu kulturu ponasanja... ali kako je ovi nas svit porebambija i sve vridnote izokrenija naopako, nije se čudit i takvima, a ca drugo reć, negoli papani...

ugodan i lip dan i neka smajlica bolje je ..."

--------------------

sad je mrvu prije sedan uri navečer. javila mi se jedna mater.

m.: "moj sin je krajnje bezobrazan prema curi. ne znan do kad će ga još trpit. nadan se da će mala bit pametna i poć ča nekome boljemu, finijen. baraba je i prima meni. velika. i je. jemate prav moja XVII, ja san za to kriva. tribalo je to dricat odavno. bojin se da je sad već kasno."

-------------------

jedna kasnovečernja, ovi čak i uviđa da je falija:

anonimna poruka: "bija san veliki gad prema curi. bija san seronja. bija san govno. kad bi išli na put, tu san se baš iživljava. ono ka, moje auto i ja san faca. e hebi ga, sad sve bi da da  je ona tu. kasno mi je sada, znan. otisla je i znan da ima pravo šta je to učinila."