Kašjuni, Kaštelet, Split - pogledi o' pozapodne by XVII

e... pa kaže jedan citat:

Nije bogat onaj čovjek koji puno ima, već onaj kome malo treba!

a šta mi poza ovih pogleda još triba, a? plivat na kašteletu? bilo je, narafski. fala ti moje more ča me voliš i jubiš, ča si za +5. fala ti moj grade ča si i pametan i lud, sve po potribi.

vengo, čovik moj, dok gledan ove brode ča pizaju puste pineze, palo mi je nešto na pamet i sad ću ti to ispričat, notat ovod, e... u ti acy gren često; ako ne svaki, onda barenko svaki drugi dan. tot svašta čujen i svašta vidin. jema recimo bogatoga svita, ali svit ča radi za njih kaže kako je mižerjasto oli nikako plaćen pa se sad pitan: a koliko je to bogatstvo realno, a?

sićan se recimo i jedne slike ča ću je pantit sve dok ne partin na vijađ zadnji, u vičnost, e... čovik, jako poznat, popularan, pivač, iz susidne države, sidi na skupi, puno skupi brod. sam. tutokompleto sam. brez sriće, brez jubavi, brez kumpanji. to nije samovanje, vengo (prokleta) samoća. u joku mu užasna bol. pari ka da nešto jema, a zapravo nima ništa. kroza to vrime na matejušku kuvaju brudet, pivaju, 'rane svit i maške. tot jemaju puno. ne more se pinezima izreć koliko jemaju. bilo je to jema par godin.

nikidan san isprid jednega spliskog portuna vidi nepoznatoga mulca, sidi na suncu, maška (ona sa 4 šape, e) mu u krilo, mazi je mali, maška gušta, mali je sritan. jema jubav u srcu, jema cili svit, jema puno. ispod gujice mu zidić o' isprid portuna, u krilo maška iz dvora, ali on zna ča je smisao. jema puno, beskrajno, njegov je cili svit. jerbo:

Nije bogat onaj čovjek koji puno ima, već onaj kome malo treba!