subota. jedna o' ritkih neradnih. (e, zato u ponediljak jeman konfužjun, ali radit se mora, a šta ćemo, e...).

evo kako je bilo... ujutro najranije banka, peškarija i pazar, poza tega oko 10 uri fina. s posebnin veseljen otvaran takujin i plaćan porez. mora se, a šta ćemo, e... obid, frigani inćuni, jo ča to volin, slatko ka med, draže mi je slistit pjat tega vengo zubaca oli brudet o' škarpine oli ugora, e... ne pretjerujen, stvarno, e... barbun,  inćun, gavun, to je slatko ka med. ko nije proba ne razumi ča govorin, nije mu kjaro znan... a škampi? jastog? e to već ne puštan tako lako... :o)

ajmo ča dalje, pozapodne narafski more. samo more. di? a ovčice danas jerbo nismo tot bili par dana, e...

evo koji litrat da vidite kako je bilo...

ka ča se vidi, konfužjun je laška, njanci na bačvice nima previše svita. ovo je uz 5. misec najlipše vrime, daj bože i deseti ovakvi pa će bit banjanja i plivanja. e bravo, e... plivanje? a danas san učini 4 puta leđno od kraja do kraja vale ovčice i još 4 puta toliko prsno od istog kraja do kraja. nije loše, e... ma nije još ni dobro, triba još radit da se dosegne forma ča je bila nekad. ne mora bit ka kad se treniralo u mornara, ali barenko da se more isplivat bačvice-zenta i nazad brez stat, e... ka nekad. trudin se, bit će bolje, e... :o)

u slobodnu danas čitan o jednoj hrabroj maški ča je prošla puste kilometre za vratit se doma, e... e pa sad, kad neko o' vrsti zvane čovik reče rič beštija i time gleda nekoga uvridit. eto šta ti je beštija, eto zaradi čega jeman šest maški, eto zaradi čega 'ranin i maške u dvoru o' isprid kuće, a nije mi mrsko dat i kojoj izist kad je trefin samu i jadnu oli s mačićima negdi ako jeman spize uza se, e...

moje maške vižitajte ovod:

http://web.vip.hr/nmagazin.vip/mace.html

još litrati splita jema ovod:

http://web.vip.hr/nmagazin.vip/radovi.html

ekola, gren ča, jema još subote, zove me, e... jemate pozdrav!